設計圖片及對白
立法會有議員大玩拉布，搞到休會前都未傾到「三堆一爐」撥款、「低收入在職家庭津貼計劃」（低津）、公務員加薪方案等，依家拉布議員又傾緊十月復會後，展開四線拉布，政府都急急應變，據聞已經度到橋喇，即係將極大機會引發拉布嘅「三堆一爐」撥款，同影響大量基層同公務員家庭嘅低津與加薪方案綑綁一齊，呢招一出，話明要拉布嘅長毛梁國雄同新東嘅范國威睇怕都要再度一度，事關拉布就會損民生，實捱批喎，點算呢？
睇番餘下嘅財委會議程，十月復會後首要處理嘅撥款係有關低津計劃嘅開位建議，之後先輪到三堆一爐，跟住有公務員加薪，即係低津、加薪撥款勢畀三堆一爐拖累，若果因三堆一爐拉布，公務員延遲加薪，實有大把怨氣，更莫講受惠於低津嘅基層市民有幾十萬，政府出到綑綁呢招，都係逼班拉布議員計吓數，繼續拉布，定向選票屈服？
至於創科局決議案同開位撥款，據聞暫時仍排喺最後，但依家仲喺工務小組同事務委員會輪候緊嘅其他民生撥款，例如佛教醫院重建工程，好快又會上到財委會排喺創科局之後，到時又再綑綁，議員唔硬食都唔得喇！
第一手消息請下載on.cc東網
