政壇：葉澍堃父子逛書展有收穫

Stephen話因為呢排冇咁忙，所以正計劃嚟緊九月全家一齊去歐洲玩。問到Stephen係退休高官，有冇留意近日政府總部「門常開」變咗門常關？佢話睇新聞時有留意到，但對呢方面就冇咩意見，依家離開官場樂得清閒，唔理咁多，得閒去吓旅行仲好喎！至於葉瀚華就專睇教人做運動嘅書籍，最後佢哋加埋買咗六、七本書，總算冇白行一趟。

舊年因為用粗口辱警出晒名嘅爆粗老師林慧思，就食住上出咗本《七月十四，我喺旺角火都嚟》嘅新書，內容除咗講佢當時用粗口鬧警察嘅風波外，仲談及六四等政治議題，佢承認講粗口可能真係做錯咗，但整體做法大致上冇問題，係警察執法不公。目前佢已經教番書，仲同其他教師成立「新師潮」團體兼顧問，關注教師就業情況同染紅教育等。