電車唔經唔覺已行咗一百一十年，畀咗城中人唔少集體回憶，「六十後」立法會議員胡志偉自爆當年讀皇仁時好百厭，試過好幾次跟埋同學仔喺車尾上車後，趁車上面人多博懵冇穿過捲閘，企咗幾個站後再靜靜雞喺車尾落車，神不知鬼不覺咁搭咗幾次霸王車。唔知電車公司知道後，會唔會同志偉追收番當年車費呢？講起搭叮叮，志偉又慨嘆，中學時期未試過同隔籬校女仔孖住搭叮叮，反而當選議員後，成日同太太坐吓叮叮拍拖，相信依家佢肯定畀足車錢喇！
胡志偉自爆當年坐過幾次霸王叮叮。
