政壇：沈祖堯撐學生修中史
近排政治爭拗一浪接一浪，香港人心不歸、青年離心更重嘅情況引起好多關注，有啲人歸咎本港學生唔學中史，學校亦冇規定必修中史，搞到啲青年人連自己嘅民族同根源都冇晒。中文大學校長沈祖堯尋日出席一個活動時就以自己為例，力撐中史科及通識科，沈校長話，佢當年讀中三時揀理科，冇讀過中史科，好遺憾！所以依家都去上中史堂，學番中國歷史：「了解同認識中國歷史，尤其係近代史，可以認識中國嘅輝煌同黑暗一面，民族感情亦會油然而生。」
設計圖片及對白
盼港生放開懷抱
沈校長尋日出席一個十大模範青少年選舉嘅活動，個活動仲有德育演講比賽，沈校長有感而發話，喺依家吵吵鬧鬧嘅香港，呢個活動好似俗世中嘅清泉咁。佢透露，周末下午會抽時間去上堂學中史，因為細個揀讀理科，冇讀文科、亦冇修過中史，家吓惟有補番數，藉此了解自己嘅國家歷史。
教育係樹人大計，沈校長強調，依家好多學生都緊張考試題目，忽略咗道德同品格一樣咁重要，所以佢亦撐學生學習通識科。自從新學制改革之後，教育界對中史及通識科嘅討論唔少，沈校長以佢嘅親身經歷同大家分享，對呢方面嘅討論都係好事。
除咗講到中學教育之外，沈校長尋日都被問及內地精英生怕咗中港矛盾，減少嚟香港升學一事，佢話，喺中大就見唔到內地生同本地生唔融洽嘅情況，佢希望香港學生可以放開懷抱，即係包容、豁達一啲。至於有專上學生團體就政改發表罷課嘅言論，佢就只係話，學校係會正常上堂嘅。
