SUN奇古怪：Sun潮語：【露暈】
潮語「露暈」嘅意思，即係指有啲女士，尤其係博上位、博出位嘅o靚模，唔知有心定無意露出胸前乳暈，「露暈」同老牌歌手露雲娜係絕對無關係。
一年一度書展又開始，不經不覺已經辦咗二十五年。回想自己細個學生時代，書展係每年暑假一個重要節目，除咗可以一次過睇吓有咩新書出之外，仲有機會可以見到心儀嘅作家，攞簽名，買特別版嘅書，當然唔少得要帶埋女朋友去拍拖，Chok文藝青年氣息。但係唔記得係由幾時開始，連漫畫嘅出版商都去書展開攤位賣書，兼且仲會推出好多咩珍藏版、限量版公仔同兵器，之後就搞到書展變成動漫迷嘅樂園，仲要通宵排隊嗰隻。幸好，後來貿發局另外再開多個動漫展，將啲動漫出版商同動漫迷分流出去。但係，近年又有啲出寫真集嘅出版商，連同一大班波濤「胸」湧、青春無敵嘅o靚模佔領書展，搞到本來好有文學氣息嘅書展，變成賣肉賣慾之地，大熱天時美少女，無論具備模特兒質素與否，一樣袒胸露臂，有時仲故意走光，惹嚟「露暈」驚魂！書展主辦單位察覺到此風不應長，所以將寫真集同o靚模掃地出門，令一眾o靚模要覓地「露暈」谷寫真！
不過，如果o靚模界鼻祖周秀娜因為要挽救人氣，又或者想搞新聞而喺公眾場合「露暈」而變成「露暈娜」咁就另作別論。「露暈」呢個行為，近一兩年時有發生。正正係因為書展謝絕o靚模，但係寫真集出版商又唔想放過搵錢機會，同埋大量去書展嘅人流。所以，佢哋都會選擇喺書展會場以外附近嘅地方，叫啲o靚模青春少艾，搞啲出位嘅宣傳。
去年有隊少女寫真二人組合，就喺通去書展嘅港灣道天橋，當眾接吻「打車輪」搞另類宣傳，她們其中一個，更喺其他場合「露暈」，被記者影到，之後就被稱為「露暈」女，可說係書展以外嘅人間風景。「露暈」又好露乜都好，雖然你可以批評佢哋有傷風化，但佢哋都係搵啖食啫，做o靚模總比做其他更差嘅嘢好吧？
