SUN搞作：網絡小說：食飽一定救你
有雞先定有蛋先，科學家都要拗一大餐先至搵得出答案，但係食飯緊要定救人緊要？唔使講，梗係救人啦！偏偏，呢個香港就有個燒房處，覺得食飯緊要過救人，仲成立咗一支特別支援食飯隊，專責頂飯更，市民真係谷氣又吹脹。
你有你谷氣，呢個燒房過氣處長錯鑫，退咗休無所事事，走去茶樓搵水吹，仲亂噏廿四大讚特別支援食飯隊好嘢，睇佢點講：「正所謂辛苦搵來志在食，個個都要食飯㗎啦，食飽啲，做嘢落力啲，好事吖！」錯鑫一邊扯煙，一邊好似餓鬼咁喫點心，仲要廢話連篇，搞到搭枱阿伯忍唔住質佢：「食飯食遲啲唔會死嘅，影響救命點講得通？」
錯鑫聞言笑道：「錯錯錯！你睇吓貪曾貪湯，就係因為遲遲都唔拉，所以搞到香港烏煙瘴氣。一個遲字，就係萬惡之源，同佢比，人命一啲都唔值錢……」錯鑫喺口水橫飛之際唔小心骾親，一口氣接唔上，已經就嚟窒息，急急向搭枱阿伯求救：「救……救命！」搭枱阿伯呵呵而笑：「梗係食飯重要過救人啦，放心，食飽有氣有力，一定救你！」
