「少膽虫，畀你做咗腦腫咁耐，成間壹全霉就霉咁耐，《爛果》銷量就跌咁耐，今日我唔同你多講廢話喇，你自己辭職啦！」本虫一返到堆填區，就畀淫賤黎施口技恐嚇，換轉其他人，可能已經驚到跪低嗌唔好，但係我服侍咗淫賤黎咁耐，知佢五時花六時變，最緊要眼前呢刻耍走佢，冇有怕嘅。
「腦細，你有冇睇世界盃？巴西隊兩場輸十粒，全個巴西都叫個領隊下台，佢都唔肯即刻辭職啦！我非常欣賞佢，點解？因為佢有承擔！要走好容易，留低先需要勇氣！眼前所謂勝負何足掛齒？就算《爛果》銷量輸足成條街又如何？我有信心，四年之後一定可以帶領壹全霉走出低谷！」
淫賤黎見我講得鬥志昂揚，竟然就咁信咗，仲感動到流下鱷魚淚，真係蠢過隻豬。只見呢個冇腦嘅腦細，挺住大肚腩遙望垃圾山呢喃：「四年之後就可以走出低谷，壹全霉，頂住呀！」本虫一邊偷笑一邊鬆人，說穿了，唔通賴死唔走真係有承擔咩，為咗呃多幾年薪水咋！四年之後？我都收得山啦，理得你死咩！
第一手消息請下載on.cc東網少膽虫
