設計圖片及對白
悠長暑假開始，唔少議員都計劃外遊，立法會商界議員廖長江透露，月底會同家人搭飛機去冰島及維也納旅行，之後再喺莫斯科轉機返港。馬來西亞航空一架波音客機前日喺烏克蘭接近俄羅斯邊境墜毀，乘客及機組人員全數罹難，廖長江都好擔心佢要喺莫斯科轉機，驚住飛機會成為武裝分子襲擊目標，猛咁問任職航空公司嘅朋友，佢搭嗰架飛機會否經過烏克蘭上空，知道唔會經先放心啲！
嘆做議員接少好多官司
廖長江話，屋企人本來買定機票諗住月中出發，但立法會早前揚言要加多兩日會，於是佢決定改機票遲啲出發，點知最後立法會可以喺原定時間內審議及通過DSD（雙倍印花稅），令佢白白蝕咗一筆冤枉錢。佢話囝囝對地理甚有興趣，於是一家人去冰島欣賞自然風景，之後就再去維也納聽歌劇及品嘗地道美食。
雖然廖長江係執業大律師，但佢話做議員令佢接少咗好多案件，擔心就算日後唔做議員都無人搵佢打官司。佢憶述，去年有朋友打算介紹一單生意畀佢，但佢因為要留喺會議廳「撳掣」而臨時「甩底」，激到朋友紮紮跳之餘，仲講到明以後唔會再介紹生意畀佢喎。
第一手消息請下載on.cc東網
