應耀康尋日喺房委會首度公開發言，言談間大講上手栢志高。
一個官職嘅前後任關係實在好微妙，好聽啲嘅，下一手係承接者，唔好聽嘅，下一手分分鐘要執蘇州屎。今年四月初，資深政務官應耀康（Stanley）接任房屋署署長兼運輸及房屋局常任秘書長，尋日佢出席房委會公開例會，首次喺大會上公開發言，不過，Stanley連珠炮發都同上手有關，究竟係冷笑話，定係寸邊個？大家真係要自己領會。
外表幾嚴肅嘅Stanley開場白時，無啦啦講到前任，佢話好「佩服」前署長栢志高身兼兩職之餘，仲要處理買家印花稅及十五年一遇嘅長策諮詢，仲要喺繁重工作壓力下都可以保持心廣體胖。究竟佢想講乜呢？如果讚前任工作多，點解又要提人肥咗呢？唔知佢係想寸栢志高hea住做唔夠落力吖？定係想自呻接手後好多嘢要做呢？講講吓，Stanley都有樣甘拜下風，佢話栢志高好識唱歌，但佢就保證唔會唱歌喎。
第一手消息請下載on.cc東網
