立法會過去幾個月拉布拉不停，因「拉布」而結合嘅陳偉業（大舊）、陳志全（慢必）、梁國雄（長毛）同范國威（Gary），已經諗緊復會後嘅「拉布」大計，仲揚言復會後要聯群結隊「四線拉布」，誓要全方位拖垮創新及科技局、三堆一爐及港珠澳大橋人工島撥款。
人民力量嘅大舊同慢必尋日回顧過去一年議會工作，話相當滿意今年「拉布」成績，大舊形容今年超額完成，感到好自豪、驕傲兼有成就感，連小蠔灣廚餘處理廠都因為建制派突然倒戈而被迫中止待續。
為確保「拉布」行動萬無一失，佢哋已經同長毛、Gary溝通好，來年度除咗繼續喺大會、財務委員會「拉布」外，連財委會轄下嘅工務小組委員會及人事編制小組委員會都係佢哋頭號目標。
現時工務小組只得大舊同Gary坐鎮，人事編制小組更只得長毛一個人，為避免重蹈大舊六月想臨時加入人事編制小組被否決嘅覆轍，四子決定來年齊齊加入兩個小組委員會。
據了解，盧偉國（WK）下年度有機會冧莊做工務小組主席，人事編制小組就有可能由田北俊（田少）從葉劉淑儀手上接棒任主席，假如四子最終齊腳，睇怕WK同田少都有排頭痕喇！
第一手消息請下載on.cc東網
