政壇：白韞六暗寸貪湯佗衰家
防貪打貪係廉政公署嘅使命，但前廉政專員「貪湯」湯顯明被揭發在任期間收禮、送禮，甚至公務期間逍遙遊等事件後，自己一身蟻畀人鬧爆，最慘係令廉政公署受累，不但損壞廉署聲譽，仲令好多廉署中人抬唔起頭。接任廉政專員嘅白韞六可能都慨嘆重建形象需時，尋日出席一個青年領袖活動開幕禮，就借致詞講到，如果一個人唔廉潔，唔單止影響個人聲譽，仲會損害一個機構嘅形象。莫非佢暗寸貪湯「一粒老鼠屎攪壞一鍋粥」？
設計圖片及對白
白韞六致詞時寄語青年領袖要有良好品德，佢話，希望在場青年領袖除咗要有能力，最緊要就係要有誠信，即係要保持誠實、公平、負責任及守紀律，先至可以作為其他人嘅道德坐標。佢喺致詞中，特別舉咗啲世界名人一失足成千古恨嘅例子，譬如七屆環法單車賽冠軍岩士唐，被揭發服用禁藥，以及雅虎前CEO Scott Thompson被揭發虛報學歷，最終都要面對大眾譴責。
籲對誘惑「零容忍」
其實，香港都有好多高官犯上差不多嘅「罪行」，但白韞六似乎好避忌，引用香港例子時，只係以近日世界盃為例，佢話，講番廉署四年前處理過嘅打假波案件，以及法國一個有為青年見工時只因被揭發曾經搭車唔畀錢，搞到不獲聘用，所以叫大家對誘惑「零容忍」。
本港接二連三出現貪官，揭發嘅一大禍源，都離唔開身居高位嘅人貪婪不自制，甚至假公濟私，最終令機構同香港蒙羞，呢啲人同事除咗應受到法律制裁外，的確應該成為下一代借鏡嘅前例，咁樣先可以趕絕貪腐之風。
