黃毓民幾乎年年都出書，累積唔少死忠粉絲，唔愁銷量。
每逢選舉，泛民主派同建制派都要為選票爭崩頭，其實要穩固票源除咗「蛇齋餅糉」，每年出書都係方法之一。書展尋日開鑼，議員葉劉淑儀同黃毓民今年繼續各有新書出版，其中葉劉繼續靠教英文吸納學生同師奶支持者，而一向精於「文鬥」嘅毓民亦將過去一年政論結集成書，吸引大批「信徒」排長龍搶購，雙方各有粉絲唔使爭。
葉劉淑儀笑言英文教學書銷量唔及o靚模寫真咁高，但佢出書唔係志在搵錢。
張漢賢尋日忽然現身內地出版社攤位抗議政改諮詢報告。
葉劉尋日下晝低調現身新書簽名會，唔少行經嘅市民、湊熱鬧嘅人及求知若渴嘅學生及其家長，驚見葉劉親身上陣，都即刻買番幾本畀葉劉簽名，葉劉更唔錫身主動俯身書堆同書迷合照，唔怪得銷量都算唔錯。葉劉坦言，英文教學書銷量點都唔及愛情小品、o靚模寫真、鬧政府等呢類「激情啲」嘅書籍咁受歡迎，但佢出書唔係志在賺錢，可以幫到學生學英文一樣好滿足。
另一邊廂，幾乎年年都有新作嘅毓民尋日亦落場簽書兼同支持者會面，大批毓民嘅死忠粉絲一見偶像現身，即刻買書兼乖乖哋排隊等簽名，似乎「激情啲」嘅書真係幾好賣。
新聞處賣舊書拍烏蠅
有人出書表達政見，亦有人親身去書展表達聲音，「香港人優先」成員張漢賢尋日突然現身某大內地出版社攤位，仲高舉「公民提名」標語，抗議前日出爐嘅政改諮詢報告暗示否決公民提名。雖然張漢賢喺內地出版社攤位舉標語，但始終書展喺香港地方，保安亦未有發現佢嘅行蹤，令張可以喺「簡體字」嘅地方暢所欲言。
至於去年全場「拍烏蠅」嘅政府新聞處，今年依然死性不改，九七年出版、慶祝「七一」嘅《邁進新紀元》圖冊繼續當「新出版刊物」以「優惠價」十七元出售，難怪新聞處今年繼續拍烏蠅。新任處長聶德權真係要諗諗計，唔好畀個攤位成為政府財政負擔先得！
第一手消息請下載on.cc東網
