政壇：搞搞政：立會反映社會矛盾 十月再開恐圍「成」？
本年度立法會會期將喺聽日完結，主席曾鈺成尋日舉行年結記者會，形容過去一年係「多事之秋」，又話隨住政府正式開展政改五部曲，預計來年行政立法關係會比今年更差。佢話立會今年嘅爭議比以前多，係因為社會矛盾日趨尖銳，而立會就成為社會嘅縮影。佢寄語行政機關同議員要以負責任態度處理大家之間嘅矛盾，同埋思考大家點樣可以繼續合作落去，否則雙方關係只會愈嚟愈差。
設計圖片及對白
改《議事規則》無用
對於大會同唔少事務委員會出現「拉布」情況，搞到多條政府法案同撥款申請唔可以如期通過，曾主席認為，唔可以將呢個問題歸咎於「拉布」所致，又質疑如果「三堆一爐」等部分撥款喺社會有好大爭議性，順利通過對社會都未必會有好處。佢又話雖然部分議員成日採取「拉布」手段阻撓立會通過部分法案，但佢哋都會判斷邊啲法案對民生有較大影響，亦會顧及社會反應，及時結束「拉布」行為，覺得外界唔使事事都有咁大反應。
咁有冇辦法處理流會同拉布等問題？佢重申如果立會唔修改《議事規則》，議員繼續利用《議事規則》容許嘅條文不斷發言同點算開會人數，根本唔可以徹底解決問題。佢又以之前「長毛」梁國雄着短褲入會議廳開會為例，話《議事規則》只係規定議員要着得莊重，但如果二十個男議員一齊着短褲入去開會，佢根本唔可以單靠《議事規則》解決問題，再次寄語政府同議員要諗辦法修補行政立法關係。
咦！立法會喺十月再開波，唔通曾主席預計班短褲議員會圍佢？咁咪變咗十月圍「成」？
