話說立法會行政管理委員會喺舊年初邀請前秘書長Pauline吳文華，撰寫立法會歷史、規則同行事方式參考手冊，「天書」一共有三本，首冊有關立法會歷史、組織同程序介紹已經完成。Pauline尋日喺記者會上大嘆寫「天書」唔容易，皆因立法會日日都有新發展，搞到佢寫完又要再改，務求將最新情況寫埋入本天書內。

吳文華話立法會日日都有新鮮事，搞到本「天書」寫完又要改。

點解要寫完又再改呢？原來係立法會主席早前裁定有議員着短褲開會唔莊重，要求換過條長褲先可以返會議廳。Pauline透露自己知道呢件事後即時高叫「大鑊」，事關原來佢已經寫完第二本手冊中有關議員衣着嘅部分，但就因為呢件事搞到佢又要重新再寫過。

如果秘書處將議員挑戰《議事規則》嘅例子寫晒入「天書」，議員咪可以照辦煮碗攞嚟挑戰主席？Pauline就話自己立場中立，唔係想幫啲議員「鑽空子」，又大讚今屆議員熟讀《議事規則》，唔似得以前咁要逼啲議員睇喎！

第一手消息請下載on.cc東網iPhone/iPad/Android/Windows Phone Apps