慢必尋日凌晨喺社交網站將狀態改為「戀愛中」，有近五百名網民畀「like」。（互聯網圖片）
喺兩年前當選立法會議員後正式「出櫃」嘅人民力量「慢必」陳志全，感情一直未有着落。日前八到慢必終於搵到「The One」，但就唔肯多講幾句，直到尋日凌晨，先至肯喺社交網站公布「戀愛中」，佢黨友「星屑醫生」歐陽英傑等人都即刻恭喜佢，近五百名網民仲畀個「讚（like）」佢添！
陳志全
慢必甜絲絲話其伴侶係細佢十年嘅專業人士，兩三個月前喺健身中心相識，今次佢依舊採取主動，大家交換電話後，就好似其他情侶咁互發短訊、行街、睇戲同食飯。慢必話大家都有心理準備會畀人知佢哋嘅新戀情，但佢伴侶嘅家庭較傳統，又驚工作有麻煩，所以講明唔會主動公開合照。
至於呢個新伴侶係咪「真命天子」？慢必透露，已經帶咗佢見媽咪，但唔想畀壓力對方，形容「每一步都係突破、冒險」。雖然慢必冚得咁密實，但其實前晚新伴侶曾現身立法會接慢必收工，而下月中又會同遊日本九州、鹿兒島，唔知到時會唔會有人撞到佢哋呢？
第一手消息請下載on.cc東網
