貨櫃劏房熱死人 官僚無能禍蒼生
如果話，劏房嘅出現係港府房屋政策一塌糊塗嘅象徵，咁劏房亂象叢生，應該就係本港房屋問題積重難返嘅標誌咯。今時今日，劏房遍地開花，無處不在，無奇不有，唔止工廈、豬欄、雞寮有人住，連貨櫃都成為蝸居竇口，講起真係可悲。
嗱，上水、元朗就係其中兩個貨櫃劏房重災區。本報記者實地視察，上水黃崗山村有一幢兩層高嘅貨櫃劏房，六個貨櫃各住一戶人家，喺豆腐膶咁細嘅鐵皮箱裏面，居然可以間出客廳、睡房、廁所同廚房，月租四千蚊，長年爆滿，有價有市。而元朗仲誇張，崇山新村直頭出現一個貨櫃劏房小型屋苑，十個貨櫃用鐵閘圍起，自成一國，每間劏房二百幾平方呎，只有一至兩個窗戶，通風不足，翳焗難耐，一樣不愁客源，其門如市。
貨櫃劏房有乜風險？舊年上水曾發生一宗貨櫃劏房熱死人事件，你話危唔危險吖？
冇錯，入住貨櫃劏房分分鐘要搵命博。正如測量師話齋，鐵皮屋溫度一般比室外高幾度，加上通風不足，又熱又焗，住客好似置身大焗爐，隨時中招都唔知發生乜嘢事。至於其他居住環境問題，亦唔使多介紹咯，空間狹窄，衞生惡劣，易生火警，簡直危機四伏。不過咁，有頭髮邊個想做瘌痢吖，人人都知劏房環境差又危險，無奈基層市民根本冇得揀，香港一屋難求，唔住劏房，唔通瞓街咩？
唉，蟻民為勢所逼，入住豬欄雞寮固然係香港獨有嘅悲情一幕，家陣要好似貨物咁屈身舊貨櫃之內，同樣係非人生活。太一叮想請問港產官僚，你哋開口埋口將房屋問題視為重中之重，唔通呢啲就係你哋嘅功績？唔通呢啲就係你哋想要嘅結果？
講來講去，都係港府無能之過。係人都知，要解決住屋問題，消除劏房亂象，關鍵在於增加房屋供應，可惜吖，當局絞盡腦汁，四圍搶地，結果處處碰壁，一事無成。以新界東北發展計劃為例吖，本來不失為其中一個闢地建屋嘅主要來源，點知推銷過程問題多多，阻力重重，最後仲演變成政治風波添，搞到七國咁亂，雞犬不寧。今屆政府經常話迎難而上，可惜推出一項，跪低一項，迎難而上嘅唔係港產官僚，而係民怨就真！
當然喇，新界東北發展計劃寸步難行，除咗因為港府無能，亦因為政客無良。立法會成日吵吵鬧鬧，為反對而反對，為拉布而拉布，香港有運行至奇喇。香港不斷沉淪，睇怕以後連貨櫃劏房都冇得住，搞到無殼蝸牛要瞓街都似，叮！
