SUN奇古怪：SUN潮語：【育 成】
「育成」呢個潮語嘅意思係培育或培養某人，成為某方面嘅專材，或者係「育成」某種技能。呢個詞語其實本身係日文漢字，並非真正中文。「育成」起初係出現喺一啲日本電腦遊戲，有啲Game係需要靠玩家不斷完成一啲任務或通過一啲關卡，之後遊戲角色就會不斷學習同升Level，「育成」為一強勁人物，裝備超強技能。
生仔唔難，養仔唔難，教仔最難！所謂養兒一百歲，長憂九十九。我諗好多為人父母嘅都非常認同呢句話。我自己作為兩子之父，完全明白為人父母嗰種心情。睇住小朋友呱呱墜地，然後牙牙學語，行第一步，叫第一聲爸爸，第一日返學，上小學……睇住小朋友一日一日長大，就好似喺自己嘅人生裝上快鏡一樣，小朋友眨吓眼就大，而自己亦眨吓眼就老，青春一去無影蹤。喺教仔方面，亦係高難度動作，尤其喺香港生活，到底要幫佢建立咩價值觀？例如教小朋友唔好講大話，但係電視新聞不斷循環播出嘅都係大話。例如教小朋友警察係除暴安良兼正義嘅朋友，但現實中嘅警察原來會生安白造無理拘捕，將和平示威者以武力抬上車！當教導小朋友，要守規矩，但當佢見到好似吳亮星之流，可以罔顧議事規則，任意施行議會暴力！作為「港爸」，請教我如何「育成」香港下一代？
潮語「育成」並非指曾鈺成，雖然要「育成」曾鈺成呢類人物，可以黨性大過人性，本身係一件相當困難嘅事。
另外一類「育成」遊戲就係要玩家經營一家足球會，由起初實力較弱、資金緊絀，通過玩家努力「育成」而為大球會。後來「育成」呢個字就被人借咗嚟用，變成潮語，並且就按字面解作培育。有時「育成」亦可解作男女之間相互影響，例如可以將「港女」女朋友「育成」為肯陪你去食麥當勞嘅女朋友。
當然養兒育女，更加係一項一生嘅「育成」。好似某政要嘅女兒，喺個備受注目嘅家庭成長，要「育成」而為出色嘅孩子，真係唔係容易嘅事，我真係戥佢老母難做。
