政壇：搞搞政：議會暴民化 林大輝憂心
立法會最近好似戰場一樣，內有議員掟溪錢、掃枱升級至掟玻璃杯，外有數百市民衝擊立法會防線，竹竿、鐵馬用齊，政治環境好似一點就爆咁，好多市民都憂心忡忡，商界立法會議員林大輝尋日就話，議會拉布最多癱瘓議會，但佢擔心嘅係暴民政治抬頭，呢種趨勢對社會嘅傷害性更大，佢仲話，再係咁落去，議會就唔使開會，日日返立法會都係打交、掟嘢喇。
設計圖片及對白
林大輝指出，過去議會曾出現向財政司司長曾俊華撒溪錢事件，但早幾日，特首出席答問大會，有議員升級至掟玻璃杯，呢啲行為已經超過「拉布」帶嚟嘅創傷性，佢擔心呢種唔好嘅情況持續落去，議會全武行都唔出奇。
堂堂立法機關搞成咁，啲議員真係做咗好壞嘅示範，唔係話民主嘅真諦係即使唔同意對方嘅意見，都全力捍衞對方嘅發言權咩？點解到咗香港，高官就成日要肢體受靶嘅呢？唔係中蛋、就係被掟有殺傷力嘅物件。咁樣落去，港式政治同爛仔政治有乜分別？
