中文大學政治與行政學系高級講師蔡子強日前就特首梁振英囡囡梁齊昕鎅手事件寫咗篇評論文章，點知就被特首夫人梁唐青儀點名批評為「淺薄、無知、冷血、涼薄」，立會議員陳志全（慢必）尋日出席電台節目時話，梁太口講想保護個女，依家反而造成反效果，簡直係公關災難。

慢必話，蔡子強篇文本來都冇咩人睇，齊昕鎅手亦開始冇咩人講，但梁太鬧爆蔡子強後反而令更多人提番起件事，令事件再度升溫。佢又話，有啲嘢想叫人唔好講，最好就係自己收口先，但梁太無啦啦向蔡子強挑機，令人質疑梁太嘅出發點究竟係為啖氣，定係想保護個女呢？建制派議員蔣麗芸就批評蔡子強篇評論文章中提及嘅「虎毒不食兒」，係傷害到一名母親。議員田北辰亦話，公眾人物不須向社會交代家庭事，外界應尊重公眾人物嘅家人。

第一手消息請下載on.cc東網iPhone/iPad/Android/Windows Phone Apps