SUN奇古怪：SUN潮語：【儲氣】
講到「儲氣」呢個潮語，其實真係不得不提另外一個潮語「民氣」。「民氣」呢個潮語應該係由一個年輕人為主嘅政治組織發明，「民氣」嘅意思即係市民激氣或怨氣嘅程度。「民氣」高，即係市民嘅憤怒指數高，聚成一股「氣」，可以好似○三七一咁，足教日月換新天。而「儲氣」嘅意思，就係積聚民氣，等待爆發，動搖統治階層。
二○一四年七一遊行人數創出新高，超過五十萬市民走到街上，為爭取普選及其他訴求，抵着火熱嘅太陽，同偶來嘅大雨由維園走到遮打道。之後，學生組織有鑑於近年大型示威活動都係行完就散水，所以用「公民抗命」嘅方式，通宵留守喺遮打道行人專區，同特首辦門外兩個地方，試圖預演佔領中環。結果係，遮打道集會，警方喺凌晨強行清場，拘捕五百一十一人。拘捕過程中，示威者完全無反抗，瞓喺條街度築成人鏈，反而警方又搣面又扣手，強行抬人。暴力與否？等你哋自行判斷。而特首辦門外嘅學民思潮同約二百名通宵留守嘅市民，情況相對平靜得多，並無出現任何拘捕行動。特首辦門前集結的人群一直留守至天色吐白，然後等特首返工，要佢回應市民訴求。結果係特首座駕飛車駛入特首辦，而特首本人時運高當睇唔到示威者，一支箭咁行入辦公室。今次行動，雖然有人被捕，但不失為一次好好嘅演習，對示威者同警方都係一次「儲氣」嘅機會，為更大型嘅公民抗命行動做準備。
「儲氣」出處嚟自電腦遊戲，係打機術語。因為有啲格鬥或打鬥類遊類如「三國無雙」等，會要求玩家角色殺一定數量敵人，每殺一啲人就會聚「氣」，「儲」夠「氣」就可以出必殺技，給敵人致命一擊。後來「儲氣」引伸到現實世界，但求要積聚力量，然後出擊嘅行動或者行為，都可以用「儲氣」去表達。如果每年七一遊行都可以「儲氣」嘅話，咁我諗儲足十年都夠力打出沉重一擊，將無能政權擊倒！可惜，嗰啲所謂帶領運動嘅人都係無能之輩，最叻消弭「民氣」，咁搞落去，只有「嘥氣！」
