香港立立亂，行政會議成員鄭耀棠（棠哥）尋日狠批泛民主派喺度搞公投、又話要反篩選，其實係想「又呃又騙又食又拎」，「民主阿婆」陳方安生仲呃埋傳媒，就連港澳辦前主任廖暉、建制派立法會議員田北俊（田少）都畀佢鬧埋一份。不過，棠哥鬧得咁過癮，雙節棍狂舞一輪，似乎唔記得咗自己都係建制派大員兼行會要員噃，香港咁多亂事，佢冇責任咩？

設計圖片

棠哥尋日同傳媒茶敍，好感慨話對香港普選睇唔到出路，仲話好似送咗入深切治療部嘅病人咁，就算醫生點努力，都係要宣布死亡喎。佢批評泛民口口聲聲要反篩選，但佢哋所謂嘅民間公投三方案咪又係「篩出來」，泛民「又呃又騙又食又拎」，仲同班年輕人吹噓、鼓勵佢哋公民抗命，根本就係泛民同年輕人之間「互夾」。

民主阿婆日前話《基本法》規定修改特首選舉，冇提及要中央政府批准，質疑北京「搬龍門」，棠哥就鬧︰「呢個人根本係欺騙傳媒、講錯嘢，一口咬定中國『搬龍門』，根本就係唔熟書，錯得好交關，但就唔出嚟認錯，半點勇氣都冇！」棠哥話，白皮書本來並無新意，唯一新嘅地方就係一國兩制包含喺中國夢入面，呢啲嘢本來廖暉就應該做好「守龍門」角色，但佢唔講，久而久之就畀人攞嚟講嘞。

棠哥狠鬧一輪後，又嘆氣話香港嘅政治水平低劣，仲暗踩喺答問大會質問特首梁振英會唔會落台嘅田少，話佢講得出咁嘅嘢係非常低莊，仲話有勇氣做建制派嘅就唔應該去插建制，仲質疑田少︰「佢係咪想做特首？定係畀佢『大佬』做咋？」棠哥鬧勻泛民同建制，或者都應該檢討吓係咪有口話人、冇口話自己。

第一手消息請下載on.cc東網iPhone/iPad/Android/Windows Phone Apps