政壇：王國興發噏風亂撐星爺
立法會內外，議員成日唇槍舌劍一番，不過，有時啲口水仗真係好鬼攞命。好似新界東北前期撥款審議期間，財委會主席吳亮星（星爺）因為身兼中國銀行（香港）信託董事長，畀泛民質疑同新界東北嘅發展計劃存在利益衝突，尋日，立法會財務委員會審議注資職業訓練局推行職業教育同就業支援嘅撥款，事前表明會「拉布」嘅人民力量議員陳偉業提出中止待續議案，又用呢個理由狙擊吳亮星。
王國興為撐吳亮星，尋日質疑身為中銀客戶嘅泛民議員一樣有潛在利益衝突。（資料圖片）
建制派中都有議員幫把口，不過，王國興嘅說法就令人忍唔住想笑，佢話，唔少泛民主派議員都有中銀戶口，認為佢哋反對理由太無譜喎。佢似乎想暗寸，吳亮星做中銀高層嘅身份，同泛民主派議員做中銀客仔嘅身份一樣，即係話如果同中銀有關係就同新界東北發展計劃有利益衝突，咁大家都有份喎。
之不過，呢句說話認真諗就知犯駁，王國興分分鐘解唔到圍，反而畀泛民再轟番轉頭。
