政壇：校長爸爸明年退休Hea吓先
鮮魚行學校尋日舉行第四十四屆畢業禮，人稱「校長爸爸」嘅梁紀昌話自己出年就六十歲，係時候退落嚟，所以做埋下學年就會退休，剩低一年任期，佢會為畢業生爭取去外國讀書，擴闊眼界，仲會繼續爭取起新校舍。
「校長爸爸」梁紀昌明年將退休，佢希望學校可繼續為基層學生爭取向上流動的機會。
响鮮魚行學校做咗十二年嘅梁紀昌話，就算政府將公務員嘅退休年期延長，佢都唔打算做落去，「校長呢個位唔應該做太耐，如果唔係想法會變得保守。」不過，相信佢離開時仲會掛心嘅，就係爭取起新校舍，事關依家學校校舍連操場都冇，又成日停電，可惜校方先後兩次向政府申請都唔成功。梁校長笑笑口話會屢敗屢戰，仲話只要有個操場就心滿意足o架喎。
問到退休之後有咩大計，梁校長話只要有能力，都會盡力回饋社會，但暫時未有具體計劃，都係隨緣啦。不過，「校長爸爸」始終唔係鐵人，佢話做咗咁多年，都係時候畀佢Hea一陣，休息吓先喎。
