泛民主派立法會議員何秀蘭(Cyd)同資訊科技界議員莫乃光(Charles)獲港府委任做太平紳士,係繼○六年衞生服務界李國麟後再有泛民主派議員獲委任,但唔少建制派同激進泛民都批評阿Cyd未夠班或唔應該攞太平紳士。

對於外界嘅批評,阿Cyd都採取「話之你」嘅態度,皆因佢諗住有太平紳士個銜頭入監獄做個案方便啲喎,真係咁簡單?

阿Cyd話,自己喺接受太平紳士任命前,都有同工黨中人及其他泛民黨派商量,覺得太平紳士只係銜頭一個,唔代表以後要事事幫住政府。佢又話,由於太平紳士可以隨時巡視監獄,又可以接觸在囚人士,比以前次次去親監獄都要申請方便得多,所以先決定接受呢項委任,方便佢日後入男女童院搵苦主喎。

聽聞唔少建制派中人都眼紅政府委任阿Cyd做太平紳士,又覺得佢唔值得獲委。不過,阿Cyd就話自己對呢啲閒言閒語真係一啲都唔介意,又反寸班建制派,話只要佢哋繼續支持政府,政府一定唔會虧待佢哋喎。話時話,點解班建制派淨係眼紅阿Cyd呢?莫非佢哋唔當Charles係泛民一員?認真耐人尋味。

第一手消息請下載on.cc東網iPhone/iPad/Android/Windows Phone Apps