政壇：陳淑玲拉隊北上摘荔枝
今年內地荔枝豐收，家族喺東莞擁有荔枝莊園嘅中華廠商聯合會（廠商會）副會長陳淑玲（Shirley），日前趁放假帶隊北上摘荔枝，一班副會長同會董拎住大籮密密手摘。今次Shirley帶隊參觀嘅千畝荔枝莊園，本屬佢爸爸陳瑞球所有，但球伯多年前已將土地捐咗畀當地市政府，不過，陳家只要開句聲，荔枝依然任摘唔嬲。荔枝莊園內仲設有實驗室，研發荔枝多達三十種，無論大核、小核、少甜多汁的，任君選擇。
陳淑玲（左二）開放荔枝莊園任君選「摘」，常董李慧芬（右一）、青委成員賴偉星（右二）及青委副主席劉子芸食到舔舔脷。（受訪者提供）
放低拉票工作歎陽光
可以一次過食三十款荔枝，廠商會會長施榮懷都話好玩過食甜品自助餐，拉埋副會長吳永嘉、楊志雄、徐炳光、吳宏斌、常董李慧芬同會董盧毓琳等，鬥快摘荔枝。傳聞有意同Shirley拗手瓜競逐會長嘅副會長李秀恒（Eddy），都有跟團湊熱鬧，嗰日暫時放低拉票工作，好好享受陽光假期。
Eddy全程做「龍友」幫團友影相，忙到食荔枝都無時間。團友摘荔枝摘得不亦樂乎，裝滿幾十個大籮，唯獨見盧毓琳停晒手，原來佢怕荔枝糖分高會引發糖尿病，所以淺嘗一粒「糯米糍」就停手，認真節制。
