政壇：EQ鬥哪吒搞到上差館
政圈相爭絕不手軟。立法會議員葛珮帆（EQ）同西貢區議員方國珊（哪吒）一向都係火星撞地球，皆因大家嘅票源都喺將軍澳，前日就發生「哪吒鬥EQ」鬧劇，事緣EQ「深入虎穴」，殺入將軍澳日出康城峻瀅，同食環署齊齊巡區滅蚊，身兼當區區議員嘅哪吒，即刻連同助理等人狙擊EQ，質問EQ就擴建將軍澳堆填區撥款意向，結果最後「兩敗俱傷」，仲搞到各自去警署報案添！
設計圖片及對白
重案組跟進案件
警方發言人證實，前日下午三點，收到一名姓葛女子嘅報案，聲稱喺將軍澳遭到十六名男女阻擋，更被推跌，仲遭威嚇咁話。尋日朝早，又有一名姓方女子報警，表示受傷，案件現由觀塘區重案組跟進，初步定為刑事恐嚇。件事究竟係點呢﹖
EQ話，近期收到將軍澳居民投訴蚊患嚴重，前日下晝三點同食環署落區巡視蚊患黑點，順便滅蚊。當區「城主」哪吒就連同助理十幾人，帶晒橫額、旗幡、「大聲公」，追住EQ示威請願，要佢交代擴建將軍澳堆填區撥款投票取態。EQ聲稱，哪吒期間襲擊、圍堵佢，雙方有肢體碰撞。佢嘅黨友之後報警，二十分鐘後警方到場，佢哋決定放棄走人，之後去咗落口供喎。
EQ話尊重言論自由，但唔應該用暴力威嚇對方，覺得依家情況變本加厲，唔應該助長，呼籲大家和平理性。不過，哪吒就反指蚊患源於堆填區，所以追問支持擴建堆填區嘅EQ，要佢遵守選舉承諾。哪吒反駁EQ惡人先告狀，屈佢襲擊，又稱佢助理錄低晒成個過程，有人涉嫌落假口供喎，相反佢同助理混亂期間都整傷咗手臂，去咗醫院驗傷兼報案。
總之兩個人你有你講、我有我講，政爭鬥到上差館，咁算唔算另類浪費警力呢？
