自從香港警察沒有「皇家」呢個牌頭照住後，本來已明顯「公安化」的了，但近期卻更down grade為「城管級」，仲唔係北京上海大埠的，而係深圳福田區嗰隻。

好端端，全球公認最佳的紀律部隊，在那個講嘢（或諗嘢）九唔搭八嘅「光明頂」總指揮異稟麾下，頓變成市民厭惡的「維穩部隊」，真可惜！

話佢哋講嘢九唔搭八，我已好中肯的了！因他撒謊講大話呀！那晚七一後的武力清場，竟然喺記招度話：「警方採取行動嘅態度係專業同克制嘅！」仲話「整個行動有廣大傳媒全程監察下進行」，並強調「大家睇得好清楚」！真屁話。

事實係：當晚約凌晨兩點半，有三百個差人衝入遮打道集會區，喝叫在場記者立即離開，後說給予十分鐘，否則會驅趕佢哋。喂！你警方又想趁無鏡頭「關顧」到的「黑位」出賤招？你當香港記者來自大陸的嗎？你知不知「喝叫」、「驅趕記者」，不單只係無知的表現？仲係打壓新聞自由的罪證呀！事後，仲敢公然自誇「在傳媒監察下進行」？只是香港記者有尊嚴及專業精神，不被嚇走，繼續留守工作咋！大話精！

香港市民係不能讓此地變成一個「警察社會」，任由城管化的「合法流氓」為所欲為的！但係，擒日，有隻鼠乸喺立法會特首答問會內嘷叫，建議特首建立「民間組織自願軍，畀佢哋特別處理時下嘅群眾運動」喎！嘩吓，開到口直指依家嘅「在職警隊」無料到啫！但咁都唔使設立另一暴力集團o架？當今天香港係明朝？要有「東廠」？

社會分化嚴重，暴力場面日益漸多，現最需要的，係溝通談判，呢隻鼠乸仲獻計搞對抗，想香港暴動咩？心腸惡毒呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東網iPhone/iPad/Android/Windows Phone Apps