城中鏡：冼國林扮侍應揸車送餐

師傅話因為度假村太大，所以佢就特登訂造四部Segway畀遊客租用，方便大家四圍去。佢仲話遲啲度假村會開間歐洲風情嘅露天餐廳，到時啲侍應會揸住架Segway上菜，快人一步保持食物熱度。

唔知係咪想試吓個效果，師傅就親自踩住部Segway傳菜，佢就好玩啦，難為一班正享用五星級度假酒店食物嘅財金界好友，畀佢嘅速度嚇親。

西樵山呢個項目係師傅嘅Baby，佢話啲嘢都準備得七七八八，預計月底正式開業。除咗有個過千畝嘅影視城之外，入面仲有個度假村，提供南美波沙球（Bossaball）場、五人足球場同埋密室逃脫等等嘅康樂設施。估唔到冼師傅除咗功夫了得之外，仲會帶領潮流，開發另類活動。