城中鏡：名人論盡扮靚經
今時今日，貪靚已經唔係女士嘅專利，唔少政商界大男人都好姿整。成日恤靚個頭、悉心配襯衣着嘅十八鄉鄉事委員會主席梁福元，尋日出席林大輝中學十周年時裝設計表演賽時，着住一件印有雀鳥同埋小鹿嘅T恤，外加招牌嘅白色西褲及西裝外套，打扮搶晒鏡，連主人家林大輝一見到佢都讚不絕口。同梁福元傾起扮靚經，估唔到佢勁有心得，記者都要自嘆不如。
梁家騮（右）同林大輝講起扮靚各有心得。
梁福元次次出門都襯到絕。
林大輝太太（左）同孫蔡吐媚到場欣賞學生設計表演。
梁福元成個森林着上身
梁福元身穿一套白色卡其色直間薄身西裝，內襯一件非常之特別嘅T恤，上面印住好多雀鳥同小鹿圖案，成個森林咁，色彩鮮艷搶眼。大輝第一眼見到即刻話：「一睇就知係意大利製造嘅靚嘢！」梁福元笑得好得戚，話件T恤啱啱新買，要成二千蚊o架！除咗幫襯名店，佢喺元朗仲有一位御用裁縫師傅，隨時度身訂造恤衫，佢仲好鍾意喺外地買衫，好似當晚着嘅西裝外套就係喺台灣買喇！
怪醫嫌老婆揀衫太鮮艷
立法會議員「怪醫」梁家騮亦有出席，咪以為醫生一定着慣西裝打晒呔，怪醫就直言唔多慣，所以佢通常擺定幾條靚呔喺車上，方便出席公開活動前執番正個樣。平日佢就鍾意休閒打扮，不過佢好懶得買衫，次次都係老婆「押」佢先一齊去揀款。佢仲呻話有時老婆揀嘅顏色太鮮艷，佢接受唔到喎！
做紡織出身嘅大輝對着衫都好講究，佢話好多人以為肥就要着鬆身衫，其實錯晒，咁樣只會顯得更大份，應該着修身啲嘅款式。好少公開露面嘅大輝太太亦有現身，仲有仁濟醫院總理孫蔡吐媚等人，場面好熱鬧。
