政壇：搞搞政：或執星爺爛攤肥仔張驚定先
話說立法會財務委員會主席「星爺」吳亮星主持新界東北發展計劃前期工程撥款搞到一鑊泡，夾喺泛民同建制派中間左右不是人。預料喺建制派協調下，下個年度將會接替星爺任財委會主席嘅議員「肥仔張」張宇人，尋日喺立法會特首答問大會上，問政府可唔可以提早將啲撥款申請交畀立會審議，同埋因應議會進度將項目申請作出彈性調動，唔好次次到會期尾先掉去立會，講句「唔該你搞掂」就算數。睇嚟佢真係未做主席就已經驚定先。
設計圖片及對白
又難怪肥仔張咁緊張，事關今次星爺只係搞掂東北前期工程撥款，但係因此而激怒班民主派，可以預見有排「玩嘢」。議員陳偉業已講到明，今日財委會將繼續向星爺提不信任動議，如果被否決或不獲處理，就會按逐項撥款申請提出終止待續、休會議案等，總之就要踢走星爺。議員黃毓民就話已就各個項目合共提交咗一萬四千項修訂，如果星爺唔處理，佢就去提司法覆核。
泛民亦有部署，除咗李卓人都會對星爺提不信任動議外，佢哋仲會兵分兩路，部分人輪住搞搞震，博被趕走拖延會議，另一部分人就會不斷就各議題提問，總之唔會畀星爺好過咁話。
