森巴兵要睇心理醫生
巴西球星瀕臨爆煲！貴為「足球王國」兼今屆世盃東道主，「森巴兵團」背負兩億國民期望當然「唔衰得」，隨着16強驚險淘汰智利後眾將失控爆喊，巴西國腳被踢爆心理失衡，要心理醫生親臨訓練基地「應診」之餘，更需每天透過Whatsapp及電郵接受輔導。
今屆世盃奪標熱門巴西，於16強惡鬥智利一役個個變喊包，前鋒尼馬唱國歌時掩面哭泣，即使贏波驚險晉級，門將施薩索拉斯亦加入喊包行列。加上兩名守將大衞雷斯、堤亞高施華日前出席巴西節目《媽媽的話》時，看畢由母親書寫的打氣信後齊齊失控爆喊，眾將明顯壓力爆煲。躋身8強後，當地傳媒便目擊心理醫生Regina Brandao現身訓練基地，她受訪時稱：「其實我每天都有跟進球員的情況，除了通電話之外，我們亦會透過Whatsapp及電郵交談。」
尼馬睇完醫生鬆晒
自98年開始便與巴西主帥史高拉利合作的Regina，自爆已接見了全體職、球員，助眾人控制情緒，然後再向「大菲」提交獨立心理報告。當中「新比利」尼馬坦承接受心理輔導後感到放鬆，中場拉美利斯昨日出席記者會時則死撐並無壓力危機，然而卻有巴西躉無視眾國腳背負沉重壓力，反而批評球員「脆弱」：「巴西國腳月賺最少200萬雷亞爾（約696萬港元）都要喊？」
「禁慾隊」全部玩完
其實巴西國腳已較部分世盃國家隊成員幸福，事關據英國《獨立報》就「禁慾令」的統計顯示，5隊「非禁慾」國家隊皆順利進身8強，當中「森巴兵」主帥史高拉利只下令禁止球員做「雜技式性愛」，對「正常性愛」大開綠燈，另外4隊分別為德國、荷蘭、法國及哥斯達黎加。相反勒令禁慾的西班牙、俄羅斯、波斯尼亞、智利及墨西哥均已執包袱，以上5隊國腳承受「谷到爆」的壓力，相信不比「森巴兵團」小。
