長者牙痛咁聲 官僚令人齒冷
開講有話，牙痛慘過大病，尤其係無力負擔私家診所嘅清貧長者，隨時被牙患折磨到痛不欲生吖。所以咯喎，有人建議港府設立「牙科醫療券」，資助老人睇牙，點知港產官僚即刻牙痛咁聲，耍手擰頭，推三推四，簡直麻木不仁。
係咁嘅，立法會尋日召開特別會議，討論長者牙科護理支援服務，結果將港府漠視老人嘅嘴臉表露無遺。有議員批評當局喺長者牙科問題上一味倡議教育及預防，形同叫長者「隔世保健」，唔止不切實際，直頭係敷衍塞責。有議員更加直斥政府做法令人齒冷，要求喺過渡期內推出牙科專用醫療券，資助長者向私家牙科診所求診。
冇錯嘞，病向淺中醫，更加要向「錢」中醫，減輕長者牙患之苦，資助睇牙不失為其中一個好辦法。講句唔好聽吖，好多長者老到就快牙都無，港府唔幫手護理修補，一味叫人預防牙患，好似賣梳畀和尚，都唔知係攞景定贈興，稍有惻隱之心嘅都唔會講出咁涼薄嘅說話喇。只不過咁，港產官僚的確夠晒鐵石心腸，佢哋回應話喎，牙科醫護人手不足，要大規模擴展服務有困難，又話關愛基金會將長者牙科服務資助對象擴大，以及會尋求同非政府組織合作咁話。一句講晒，即係卸得就卸，將護老責任當波咁踢晒出去。
難為當局仲好意思提起公共牙科服務。冇錯，現時全港共有十一間公立牙科診所，免費為市民提供服務，不過只做止痛同剝牙，至於老人最需要嘅鑲牙同補牙服務，對唔住，一律欠奉。更離譜嘅係，每間診所一星期只開兩日，每天只做半日，先到先得，於是咯喎，飽受牙痛煎熬嘅長者如果無能力幫襯私家醫生，就要半夜三更趕到診所排隊，萬一唔好彩要脫四隻牙，仲要排足四晚隊添，事關每人每次只可以剝一隻牙嘅咋。當然喇，爭到籌睇到牙已經唔敢怨咯，排唔到嘅長者只能無奈折返繼續忍受牙患之痛，因為延誤治理搞到牙患惡化，一啲唔出奇。
呢個係廿一世紀國際大都會嘅景象咩？老人家要求好簡單，只係希望公共牙科服務完善啲，減少畀牙患折磨啫，港府窮得只剩下錢，點解咁都做唔到呢？唔通港產官僚自己可以享受一流免費牙科服務，就可以麻木不仁，睇住基層長者受苦都唔理？
牙痛慘過大病，港府不斷虐老，係咪要公公婆婆上街遊行，你哋先至識驚呢？香港家陣怨氣沖天，又公投，又遊行，又佔中，唔通港產官僚慌死社會唔夠亂，遊行人數唔夠多咩，叮！
