城中鏡：孫女好腳頭 趙金卿封爵
名媛趙金卿（Kathy）榮升嫲嫲，孫女即帶旺嫲嫲獲泰國女爵士勳銜，可謂雙喜臨門！前日Kathy開心透露新抱Polly喺上個月二十三號作動，剖腹誕下Ｂ女，由於比預產期早咗一個月，令Kathy陣腳大亂，佢趕到醫院睇咗一眼孫女後，都未嚟得切抱下，就要趕去機場出差，兩日後下晝返港，一落機就去醫院睇孫。
趙金卿榮升嫲嫲兼獲泰國女爵士勳銜，可謂雙喜臨門。（資料圖片）
孫女似足爸爸李春偉，好似餅印一樣。
或赴泰擺百日宴
Kathy話阿仔李春偉幫Ｂ女取名Kinsley，又大讚孫女似足阿仔，成個餅印咁。問到點解阿仔結婚到新抱生Ｂ都咁低調時，佢話：「真係一匹布咁長，佢哋拍咗拖七、八年，上年已經註咗冊，原定計劃上年十月十八日去泰國舉行六百人婚禮，點知新抱有咗，初初佗Ｂ要好小心，所以無同人講，臨時取消婚禮時，啲朋友仲誤以為佢哋散咗，有咗未夠三個月又唔可以同人解釋咁多。」
佢話想幫孫女搞百日宴，地點或選喺泰國，又話：「因為九月我要去泰國，接受泰國女爵士勳銜，到時一齊搞百日宴兼補擺喜酒。」
