政壇：搞搞政：黃錦星 蘇錦樑拉布難兄難弟
因為激進泛民議員「拉布」，搞到立法會財務委員會就新界東北發展前期工程撥款爭議勁耐先獲通過，議程「大塞車」，至今有近八十項政府工程同民生撥款被積壓，就算加速審議，亦肯定趕唔切喺七月中立會休會前全部處理。面對呢個難題，政府其中一個處理方法就係要作出犧牲，根據撥款嘅重要性同緩急先後，重訂提交財委會表決嘅優先次序。聞說政府內部再三考量後，決定「三堆一爐」率先周五向財委會闖關，而創新及科技局就喺下周五接力出場。
設計圖片及對白
據聞環境局局長「星星」黃錦星自覺今次已數夠票通過「三堆一爐」撥款，為免有政黨喺暑假後又轉軚反對夜長夢多，希望趕喺休會前表決。但經過新界東北一役後，大家都知道財委會主席吳亮星主持會議嘅手法進退失據，再加上泛民對通過新界東北撥款嘅怨憤未平，極可能遷怒於「三堆一爐」，全力「拉布」，因此將「三堆一爐」撥款優先提交財委會表決，最終可能會得不償失，分分鐘拖死其他冇咁大爭議性嘅撥款。
人力誓報一箭之仇
至於另一項有高度被「拉布」危機嘅，就係由商務及經濟發展局局長蘇錦樑負責嘅創科局開位撥款，據知政府高層亦好想喺休會前通過，初步計劃响下周五、即本月十一日向財委會闖關，以便喺暑假正式成立創科局。不過，人民力量陳偉業及「慢必」陳志全已就創科局開位撥款申請入咗三十二個「拉布式」修正案，包括推遲創科局成立日期，甚至幫個政策局改名做「創意及科技局」、「高科技局」，以報新界東北撥款一箭之仇。創科局讓路畀「三堆一爐」，客觀效果就係「行先死先」，星星能否打破畀議員拖垮撥款宿命，還看周五有冇奇招應付嘞！
