政壇：民陣搞遊行 呻通脹難捱
正所謂通脹猛於虎，通脹唔單止加重市民嘅生活負擔，對七一遊行都有影響o架，民間人權陣線（民陣）召集人楊政賢話，由於物價高漲，搞到佢哋今年搞七一遊行嘅成本都多咗幾十萬元，單單係大會音響嘅費用就已經貴咗兩、三成喇。而佢哋今次出動嘅糾察員都比過往多咗，好彩好多都係義工，唔係條數就有排計囉！
楊政賢呻遊行成本多咗幾十萬。（資料圖片）
楊政賢尋日喺網台節目上話，除咗音響費用貴咗兩、三成外，佢哋今年租用嘅場地都大咗。過往民陣七一遊行只係得銅鑼灣同天后興發街兩個出入口畀市民入場，但今年佢哋就用埋維園中央草坪位置，地方大咗，開支自然又多啲。
不過，點解佢又唔講吓，地方大咗，籌款箱都可以放多幾個，籌到嘅錢都自然會多啲啦！
