愛美唔係女士嘅專利,其實男士都好貪靚。立法會內最具「分量」嘅金融服務界議員張華峰,都搵過唔同方法減肥,例如食營養餐單咁,原來佢仲諗過抽脂減肥,本來佢十五十六考慮緊,但一聽到重三百磅嘅拉丁舞教師幾日前喺美容院抽脂暴斃件事後,佢就即刻打退堂鼓。

張華峰竟然想過靠抽脂減腰間肥肉。(資料圖片)

張華峰兩年前剛入立法會,體重一度下見二百三十幾磅,但現時佢嘅體重,已經成為政壇不解之謎。佢話近期立法會不停點人數,食飯時扒兩啖就要返入會議廳,食到好無癮,但以為咁會輕咗就大錯特錯,因為佢食唔飽,開完會就要去食多次消夜至飽肚,結果體重就不跌反升。

所以佢把心一橫,諗住靠抽脂減掉腰間肥肉,而且佢已經詳細研究過抽脂利弊,仲睇過電腦模擬圖,覺得自己抽脂後靚仔好多,正當佢諗住扑錘之際,就爆咗單抽脂抽死人案件,所以佢話打死都唔用呢啲方法減肥喎。咁點算好呢?口講就話食少啲,但遇上「天敵」東坡肉就只能舉手投降。

第一手消息請下載on.cc東網iPhone/iPad/Android/Windows Phone Apps