政壇:住耶倫隔籬 冇人頂得順
試諗吓你隔籬鄰舍住咗個影響全球經濟嘅大人物,係咪好有Face呢?不過,同美國聯儲局主席耶倫一齊,住喺華盛頓喬治敦Hillandale社區嘅人恐怕唔係咁諗,事關耶倫「坐正」後,專屬保安小隊經常出出入入,非常擾民,據居民形容已經到咗「任何宗教信仰都頂唔順」嘅程度!
聯儲局主席耶倫
《華爾街日報》報道,耶倫保安小隊不時喺佢住嗰條小路度開快車,荷槍實彈不特止,架車仲要鬼咁大,而接載耶倫出入嗰部車就差唔多七千磅重,十分阻碇,日日停正喺鄰居家門前面起碼二十分鐘,走嗰陣仲衰到喺地面噴啲唔知乜嘢液體,短短四個幾月就留低擦極唔甩嘅污漬。
仲有呀,耶倫保安小隊租咗佢寓所附近一幢樓,然後喺天台裝咗個驟眼睇起嚟係街燈嘅攝錄鏡頭做監視,搞到附近居民牙痛咁聲。
其實,耶倫住喺Hillandale好幾年,對街坊都幾友善,點解班居民依家咁唔「包容」?查實Hillandale環境清幽,背後就靠家家戶戶遵守嗰本五十幾頁厚嘅社區規則,連種乜嘢樹、牆身乜嘢色、養幾多隻貓狗統統都有寫明,耶倫保安小隊又飛車又整污糟地方,唔乞人憎就假!