政壇：陳永棋人肉速遞靚荔枝
廣東社團總會（總會）尋日就舉行咗極之低調嘅閉門交接儀式喎！據可靠消息人士話，儀式响中午時間喺九龍灣一間酒樓舉行，席間唔見有政府高官或中方官員捧場，只係自己友食餐飯，大約筵開十幾圍，出奇咁低調。
陳永棋呢頭正式接下廣東社團總會主席重任，轉頭速遞荔枝贈老友。
身水身汗行入中建
咁啱尋日下晝約三點半鐘，總會新任主席陳永棋現身中環畢打街，見佢雙手抽住兩箱荔枝，左望右望穿過車水馬龍嘅馬路，大熱天時，有咁上下分量嘅佢行到身水身汗，眉都皺埋，最後行入中建大廈。
原來陳永棋啱啱喺家鄉東莞返香港，當地有個以佢媽媽陳方柳枝命名嘅農場，種植經改良嘅有機荔枝，前日佢啱啱喺樹上新鮮採摘咗一批荔枝，尋日即刻人肉速遞送贈老友，認真唔話得。
不過話時話，一粒荔枝三把火，依家香港政局咁躁動不安，今日仲有遊行，雖然荔枝當造又好味，但大家都係適可而止，免得火上加油嘞。
