話說台灣太陽花學運領袖陳為廷前日來港準備參加七一遊行，但畀入境處拒絕入境，要原機遣返，而同陳為廷一齊嚟嘅「島國前進」成員陳惠敏就順利入境，佢即喺香港同學民思潮等香港學界代表開記者會，抗議中共、香港政府阻撓港澳台公民團體交流。陳惠敏仲話陳為廷冇犯罪記錄，唔明佢點解被拒入境，估計係同佢早前領導反服貿運動有關。

設計圖片及對白

望第一眼已上電

正當大家以為陳為廷充滿憤怒飛返台灣之際，原來佢都有啲得着，就係識到個入境處靚女職員。當陳為廷返抵台灣之後，前晚就喺社交網站寫咗篇長文，細說呢次來港又被即時遣返嘅心路歷程，內容當然包括埋呢位入境處靚女啦！

陳為廷憶述，前日下午一落機就被帶到一間白色細房，然後有四、五名英俊高大嘅入境處人員招呼佢，但呢啲都無令陳為廷留下印象，反而一位主責佢案件嘅入境處女職員，佢形容呢個入境處女職員為「大姊姊」，仲話第一眼望見佢已畀呢位「大姊姊」電暈，又話「大姊姊」講嘢有禮貌，似足港產片入面嘅精英公務員。正所謂有圖有真相，依家冇圖，陳為廷得個講字，似乎無乜說服力喎！

之後陳為廷畀十幾名入境處職員護送下，預備搭飛機返台灣，佢話臨走時再問「大姊姊」邊度有吸煙室，一心諗住食支煙仔解愁，點知「大姊姊」話佢太後生，學乜人食煙吖！雖然陳為廷食唔到煙，但獲得「大姊姊」關心，真係乜都抵番晒啦！

第一手消息請下載on.cc東網iPhone/iPad/Android/Windows Phone Apps