高官翻閹成風 助長擦鞋歪風

規劃署最近破天荒以非公務員合約形式，聘用前副署長黃婉霜出任城市規劃委員會秘書處顧問，由於佢正在退休前休假，仍然可以支副署長全薪，加埋新工每月三萬元，每個月穩袋近廿一萬，你話係咪筍上加筍吖。以前話公務員薪高糧準福利優厚係「金飯碗」，咁翻閹後逗兩份人工，咪變成「鑽石飯碗」囉。

本來呢，港府將房屋問題列為施政重中之重，城市規劃工作量增加係事實，如果確係人手不足，增聘都無可厚非，弊在規劃署黑箱作業，搞到部門裏面唔少人媽媽聲，質疑點解唔按慣例進行公開招聘，有明益退休自己友之嫌。再講吖，正如有業界人士指出，既然呢個位需要處理司法覆核訴訟，係咪應該由具備法律背景人士擔任呢？

真係諗極唔明，私人機構請人都要登廣告再進行面試遴選啦，家陣政府用公帑開設新職位喎，唔係應該更公開透明，確保納稅人嘅錢用得其所咩？聽吓公務員事務局點解釋先，佢哋話喎，決策局同各部門可以因應運作需要，自行決定聘用非公務員合約僱員，包括離職或正退休前休假嘅公務員，毋須局方批准。真係不聽猶自可，一聽把幾火，原來公務員事務局放任自流，各衙門「自己揸主意」，咁即係無王管啫。

唔怪得近年各個衙門咁鍾意玩翻閹，公營機構甚至淪為退休高官俱樂部啦，當局官官相護吖嘛。眾所周知，高官退休後任職私人機構，有「過冷河」等限制，想搵真銀唔係話咁易，依家唔使煩嘞，政府部門只要有「運作需要」，鍾意開咩位就開咩位，鍾意請邊個就請邊個，橫掂出阿公數，使乜同你客氣吖。好似食環署咁，早前靜雞雞翻閹廿幾個退休公務員，部分首長級公務員更獲得多份收入，擺到明自己人圍威喂。

最離譜嘅係，港府竟然唔理好醜但求就手，委任神憎鬼厭嘅前食物及衞生局局長周一嶽出掌平機會，結果佢上任後繼續發揚「每周一鑊」精神，出醜多過食飯，簡直唔衰攞嚟衰。

計太一叮話齋，翻閹呢味嘢除咗浪費公帑，製造不公平，仲會進一步助長官場擦鞋文化。好簡單啫，部門阿頭掌用人生殺大權，啱嘴形嘅有得留低，關係唔好咯喎，工作能力再強，夠鐘都要走人，長此落去，官員為咗另類「延後利益」，一個二個淨係掛住擦老細鞋，仲邊有心機服務市民吖，叮！