城中鏡：名人分享風箏兩代情
為咗生活，時下為人父母日出而作，日入而息，同子女溝通時間自然少，如何拉近彼此距離呢？幾名官員同議員尋日出席一個以「愛與恕」為主題嘅風箏設計活動時，分享同子女嘅相處心得。民政事務局副局長Florence許曉暉話，做父母最重要係盡量抽時間陪仔女，而佢同老公就會互相合作，好似踢世界盃咁，各守一個崗位，再走吓位，如果走位走得靚嘅話，咁就可以完成一場完美嘅比賽喎！
陳恒鑌（左）同田北辰（右）喺風箏畫上扮飛行。
許曉暉話工作太忙，好少陪囡囡去放風箏。
林旭輝認為畫壁畫、拍微電影可以抒發情緒。
田二少最愛紙鳶被鎅
不過，Florence話因為工作太忙，所以好少同囡囡去放風箏，記得有次在內地買咗隻袖珍風箏送畀囡囡，囡囡已興奮得在家玩個不亦樂乎。同場嘅立法會議員Ben陳恒鑌都話，依家議會工作好忙，尤其係立法會「拉布」期間，要靠晒老婆去照顧囡囡，但佢一有時間就會盡量同囡囡做啲手作，當係親子活動，包括一齊整湯圓同紙風箏，未來仲計劃包埋水餃添，但佢希望立法會唔好成日「拉布」。
至於仔女都長大成人嘅議員「田二少」田北辰憶述，以前因為忙於處理生意業務，好少陪家人，到子女長大後，佢又做咗議員。不過，佢講起自己細個就好開心，記得當年好多小朋友在街上放風箏，佢亦喺九龍塘屋企天台放風箏，而且細心研究，仲學識風箏有多種線，包括魚絲線、玻璃線等，通常其他小朋友會用玻璃線鎅人哋啲風箏，但佢就鍾意畀人鎅，所以好快又要買過隻，而佢媽媽就睇得好開心。
對青年人心理好有研究嘅視覺藝術家林旭輝就話，講到底最重要係孩子同父母有足夠溝通，例如畫吓壁畫、拍吓微電影，其實都可以抒發吓情緒。
