話說立法會財務委員會審議新界東北發展計劃前期工程撥款期間，有議員助理就被質疑同示威者「裏應外合」、煽動示威者、利用議員助理證件在立法會大樓內「踩線」，部分助理更參與埋衝擊行動。早前立法會行政管理委員會就開會討論關於議員助理證件嘅問題，但原來攞咗最多證嘅議員，並唔係喺衝擊事件中有議員助理被拘捕嘅張超雄同「長毛」梁國雄，而係守規矩嘅梁耀忠，有超過三十個議員助理證，而建制派嘅葉劉淑儀同陳婉嫻就「屈居」亞軍同季軍，分別發出三十個同二十九個議員助理證。

設計圖片及對白

點解要咁多議員助理證？梁耀忠話印象中好似冇發過咁多個議員助理證，因為佢只係得十幾個同事，估計可能有啲前同事或暑期實習生離職後未退還證件。葉劉就話因為其辦事處、所屬新民黨同匯賢智庫都有同事要喺立法會工作，加上佢哋時不時都有唔少尖子實習生，所以計埋有咁多個議員助理證都唔出奇。

會計界議員梁繼昌都被指持有十幾個議員助理證件，佢就伸冤話有退番啲冇用嘅議員助理證畀秘書處，質疑秘書處未更新資料。佢又話其議員助理周澄同王浩賢都已淡出社運界，並冇參與衝擊立法會喎！

不過，發生立法會衝擊事件之後，對於議員無限制發出議員助理證件，實在令人關注，但限制議員發證又可能可能會妨礙議員日常工作，有如「斬腳趾避沙蟲」，睇嚟行管會真係要諗吓辦法至得。

第一手消息請下載on.cc東網iPhone/iPad/Android/Windows Phone Apps