近年嚟中港矛盾愈嚟愈嚴重，繼有青年人到尖沙咀等旅遊旺區指罵內地個人遊旅客為蝗蟲，到之後嘅拖篋行動，嚇怕啲旅客，商戶叫苦連天。身兼全港各區工商聯會長嘅東華三院副主席Alan李鋈麟話，其實佢做內地生意都受中港矛盾影響，為做成生意要做多重工夫，真係有啲唔方便喎！

李鋈麟深感中港矛盾加劇，希望港人對內地旅客包容啲。

Alan話以前內地人主動稱呼港人做「哥們兒」，但自從中港矛盾爆發後，依家佢要做番主動，表明大家係兄弟，否則內地人對港人嘅戒心唔會減低。唔單止咁，佢仲話以前傾生意會齊齊飲勝，但依家內地人就會排住隊嚟同佢哋飲，好似想隊冧佢哋咁款。

Alan坦言，其實一切矛盾都係出於文化差異，最重要係慢慢化解矛盾，其實內地已做緊教育，例如北京嘅中小學會教學生餐桌禮儀，所以港人只要包容啲，或是用客氣嘅語氣同旅客解說香港文化，咁就小事化無嘞！

第一手消息請下載on.cc東網iPhone/iPad/Android/Windows Phone Apps