經過連場拉布戰後,立法會財務委員會早幾日終於喺一片爭議下通過新界東北發展前期工程撥款,中華傳道會安柱中學一批校友就喺社交網站發起聯署,要求校方將有份投票支持通過議案嘅議員麥美娟剔出「榮譽校友」名錄。麥美娟回應話,尊重校友表達意見自由,以及校方任何嘅處理方法,強調日前喺立法會上投贊成票,係基於撥款只係用作新界東北的前期發展等研究工作,「如因我影響母校,想講聲唔好意思」。

麥美娟支持新界東北發展前期撥款,惹來一批中學校友不滿。(資料圖片)

校友聯署信指出,麥美娟於一○/一一年度成為母校安柱中學嘅榮譽校友,但質疑佢喺立法會嘅兩年工作,因此特致函校董會、校友會、校長同老師,要求校方慎重考慮,將佢喺榮譽校友榜中除名,形容「是次撥款是以非法投票強行通過」,又批評佢「助紂為虐」,以破壞法治的手段,通過一個不公義議案。

聯署又指出,雖然認同麥美娟嘅知名度,但認為其價值觀及行為違背安柱校訓「信義忠誠」的教誨,質疑「難道知名度或所謂的『社會地位』比品德更重要?」本報直至截稿前仍未能成功聯絡安柱中學校長回應。

第一手消息請下載on.cc東網iPhone/iPad/Android/Windows Phone Apps