政壇：最後衙前墟分享人情味
市區最後一條圍村─衙前圍村面臨清拆，衙前圍村重建關注組尋日舉辦「最後的衙前墟」活動，透過售賣傳統小食、擺賣攤檔，讓巿民分享村民的人情味故事。關注組成員話依家有十數戶村民仍然喺村內居住，另有八至九戶商販營運中，佢哋要求市建局承諾重建後喺村口建兩層高嘅仿古排屋，安置多年來以衙前圍村為家嘅村民。市建局就回應話會繼續同衙前圍村嘅有關佔用人商討。
市區最後一條圍村衙前圍村面臨清拆，現有十數戶村民仍居於村內。
「最後的衙前墟」活動吸引唔少公眾人士專誠前來留影。
父親五十年代已喺村內經營製作同維修小刀店舖嘅村民范先生，尋日展示唔同嘅刀柄，當中以柴同木材雕製而成，歷史悠久。佢喺墟市中教人製造小刀嘅技巧，有特別喺沙田前嚟嘅蘇女士攜同用上二十多年嘅刨刀，交畀范先生修理。
兩父子喺衙前圍村居住二十多年嘅郭先生，多年來以前舖後居嘅方式，喺村內經營理髮店，二十年嘅收費如一，每次理髮只收取二十元。佢話最不捨得村內的人情味，又話若市建局肯重建後在村口興建仿古屋，讓他繼續經營理髮店，佢可以五十年不變，維持二十元理髮收費。佢又指若執達吏清場，佢寧願被抬走亦唔會自行離開，會留守至最後一刻，並揚言若痛失家園，會到政總外露宿，同喺嗰度繼續以二十元為市民理髮。
