政壇：東北宣傳渣 波波捱鬧
立法會財務委員會通過新界東北發展計劃前期撥款之後，唔單止財委會主席吳亮星被抨擊，主理項目嘅發展局局長「波波」陳茂波亦惹來多方批評。不過，奇就奇在連建制派立法會議員Ann蔣麗芸尋日都喺其社交網站鬧波波。
設計圖片及對白
阿Ann尋日喺社交網站專頁分享咗段由佢朋友傳來嘅訊息，話朋友啱啱去完大會堂聽音樂會，但喺完場時，竟然有個唔知乜水嘅人喺場內大叫反對新界東北發展，真係瘋狂，又問香港點會變成咁。佢話要知點解會咁，只要睇網上歪曲嘅宣傳就知道喎，明明有百分之六十土地起公營房屋，但就被誤導為百分之六，等上樓嘅人見到點會唔嬲？睇嚟政府嘅公關宣傳真係應該要好好改善喎。
佢又上載幅圖，就係有羊媽媽睇住電視機同羊寶寶講，話「好似電視咁講，發展東北，我哋先有『香港人嘅新市鎮』」，而羊寶寶就話：「媽媽，係『新腥（香）港人嘅市鎮』先真，畀香港人公屋用地百分之六都冇！」其實波波早前已聯同房協及地政總署，就新界東北發展計劃拍咗四段宣傳片，其中房協主席鄔滿海嗰段片段更說明得好清楚計劃有幾多土地用來建屋，包括興建公營房屋，香港又有幾多人等緊新界東北發展後上樓，莫非阿Ann仍然覺得呢啲宣傳片講得唔夠清楚？
網民議論紛紛
呢個訊息出嚟之後，當然引來好多網友留言啦！有反對嘅意見，亦有支持嘅意見，有網民話如果乜都唔發展，香港就會回復一百年前漁港面貌，亦有網民話點解唔收粉嶺高爾夫球場，而要去滅人家園喎。阿Ann就話高爾夫球場當然可以拆，但呢個係老人家喜愛嘅運動，改為公眾球場又如何喎。
總之議論紛紛，但阿Ann始終都係話政府公關要改善，官員要多啲落區協調民情喎！
