立法監管歎慢板 美容悲劇何時休

有位體重達三百磅嘅女子喺美容院接受抽脂溶脂手術之後，昏迷不醒，送院不治。抽脂變斷魂，愛靚反送命，問你怕未。食衞局局長高永文例牌馬後炮，對事件表示「非常關注」喎。其實，當局對美容業監管不足，消費者安全完全冇保障，港府難辭其咎，淨係關注有鬼用咩，最緊要亡羊補牢，當局到底有乜措施防止悲劇不斷重演呢？

係人都知，美容業亂象叢生，事故不斷，當局一直視若無睹，放任自流，所謂嘅規管一味大隻講，唔出事至奇喇。

近年唔少美容機構，引入未經廣泛確定有效嘅醫療技術同儀器替顧客減肥瘦身，令醫療同美容混淆不清，好多原本只可以喺醫院由醫生執行嘅手術被包裝成美容療程，喺冇足夠急救醫療設備同全面消毒場所內進行，風險之高可想而知。今次事件除咗反映市民對醫學美容風險認識不足，亦反映當局麻木不仁。

呢嗱，淨係今年頭五個月咋，消委會已經收到六十八宗涉及接受高能量光學療程及入侵性療程嘅投訴，包括豐胸、激光技術及割雙眼皮等；此外，有五十宗投訴同懷疑美容服務唔安全有關，比舊年同期升咗超過兩倍，都咪話唔得人驚。

大家應該仲記得兩年前嘅「毒血針」事件，四名女子去醫學美容集團打美容針，結果一死三傷，其中一名傷者要截肢保命。呢宗悲劇揭露咗呢類所謂醫學美容根本無王管。

食衞局事後賊過興兵，煞有介事成立檢討委員會，話會研究設立發牌制度，限制醫生只可以喺合規格及持牌醫療中心做包括抽脂在內嘅高風險手術喎。結果又係得個拖字，原定用一年時間檢討，拖到今個月中至提交最後報告，點知仲未上立法會，悲劇已經重演。正所謂，「官不殺伯仁，伯仁因官而死」，當局明知醫學美容風險高，立法拖得就拖，你話係咪靠害消費者吖！

講開又講，港府一向對美容業無監無管，搞到業界良莠不齊，美容變毀容早就唔係新聞。本報上個月至踢爆，備受都市女性青睞、做到成行成市嘅熱石按摩減壓，原來冇註冊制度不特止，連操作亂咁嚟都冇人理，有消費者畀熱石辣到「二級燒傷」，隨時毀容都似。

美容業無王管，消費者同搵命博冇乜分別，試問仲要死幾多人，港產官僚至會做嘢？叮！