SUN奇古怪：SUN潮語：【私煙】

香港，到底仲係咪香港？呢個問題，到底又係唔係問題呢？呢兩年嚟，香港好似中咗降頭咁，社會嚴重分化同撕裂。自從特首智囊中央政策組首席顧問邵善波，揚言發動以群眾鬥群眾方式，對付反對派嘅公眾集會遊行後，即刻就形成咗一門新興行業，創造咗就業。呢一行叫做「職業示威者」，毋須經驗，年齡不限，即日出糧，仲歡迎新移民！

每次社會爆發反對政府嘅遊行集會，呢班人即刻有工開。佢哋以老弱婦孺為主，永遠同反對派打對台，人數多少應該係視乎Budget，同中間人有無落格中飽私囊。佢哋好多時被記者問到，都會唔知自己反對乜嘢，總之有飯食有錢收，嗌大聲啲就得！搵啲咁嘅人嚟畀全港人嘅印象係乜？咪係香港只有甩皮甩骨嘅人，先會支持呢個甩皮甩骨嘅政府！想賺多啲應該專業少少，學吓李「私煙」咁，玩埋無限期絕食，頂唔順就去醫院打個轉，做戲做全套！佢仲寫埋遺書，呢啲就叫有職業道德喇。

呢位香港家長聯會兼油尖旺區家長教師會會長，竟然走去政府總部外無限期絕食，仲寫埋一封成幾千字嘅絕筆遺書，要求政府嚴懲衝擊立法會嘅示威者。結果無人支持不特止，晚晚只有佢一個人獨守空營，唔到幾日就話不適要送院，依家仲喊住咁食番嘢。

李「私煙」呢個行動，成為網民嘅笑柄！第一，佢嘅訴求根本無需要爭取，政府握有權力，基本上以今日嘅形勢，佢哋想點樣屈機都得，絕食嚟做乜？其二，佢到底代表啲乜嘢人去爭取？如果只屬佢嘅個人不滿，點解政府要理佢呢？所以，佢呢個行動除咗整cheap咗「絕食」兩個字，更同時令政府支持者蒙羞。

話說回來，其實「私煙」代表偲嫣之外，真正嘅解釋係「走私香煙」，即係未完稅嘅香煙，喺香港買賣都係犯法，大家都係要注意。