政壇：搞搞政：公記無大將新東位讓路

靠新民黨出人

有新民黨中人透露，即使該黨同公記結盟，但派人參選嘅主導權其實喺公記一方，只可惜公記咁多區議員之中，有啲年紀大嘅，但形象唔出位，賣相又欠奉，而年輕嘅一批就雖有幹勁又醒目，但始終形象唔夠突出，太新喎，即使勉強在老或嫩嘅區議員之中搵個人出選，亦可能不服對方。換言之，即係公記出現斷層、蜀中無大將喇。咁係咪暗示新民黨要空降黨員出選新界東呢？據聞該黨要搵位有專業形象嘅人空降參選唔難，但係咪贏到就好難講喇！

至於公記又點睇呢？有公記中人話，如果真係再參選嘅話，就只許成功不許失敗，因為上屆幫過沙田區議員龐愛蘭助選，但成績一般，如果再輸多屆，公記就可能永不超生喎。所以公記只有兩個選擇，一係唔選，一係派位有十足把握嘅人參選，如果到最後一刻都搵唔到一位明星級人馬出選，就算係新民黨搵人空降新界東參選，佢哋都冇所謂喎。