政壇：李偲嫣喊住結束絕食
講明早就寫定遺書、誓言要「絕食到死」嘅「正義聯盟」召集人李偲嫣，尋日終於喊住食番嘢喇！為抗議反對新界東北暴力衝擊而展開無限期絕食嘅李偲嫣，繼日前送院吊完鹽水，再重返政府總部對出繼續絕食後，到昨晨三時許、即連續絕食約一百一十小時之際，出現強烈腹痛同頭暈，喺不情不願下被盟友送往律敦治醫院急症室搶救，避過喺下午同反東北示威者正面交鋒。
李偲嫣尋日第二度送院，最終喺盟友請求下喊住食番嘢。
正義聯盟秘書處話，李偲嫣送院後起初仍堅持絕食，但醫生話佢再咁搞落去，會造成嚴重同永久嘅傷害，喺大家「強大的壓力及請求下」，李偲嫣終於喺「痛哭下開始進食」。
李偲嫣住院期間，佢喺政府總部外架起嘅帳幕，被政總職員以「危險」為由清場，但喺佢個帳幕隔籬、擺放咗已有一段時間嘅反對派示威攤檔，就安然無恙冇人理。李偲嫣批評政總執法不公，清場前又冇知會佢，要求對方解釋喎！
